បន្ទាយមានជ័យ៖ កាលពីថ្ងៃទី០៥ ខែកញ្ញា ឆ្នាំ២០២០ កម្លាំងនគរបាលចុះបង្រ្កាបទីតាំងល្បែងស៊ីសងខុសច្បាប់ (អាប៉ោង ) ត្រងចំណុចវាលត្រពាំងច្រាំង ខាងលិចភូមិ ផ្គាំ ឃុំ សិង្ហ ស្រុក អូរជ្រៅ ខេត្តបន្ទាយមានជ័យ។

តាមប្រភពព័ត៌មានចេញពីសមត្ថកិច្ចបានឲ្យដឹងថាការចុះបង្រ្កាបទីតាំង អាប៉ោង ខាងលើធ្វើឲ្យអ្នកលេង និងមេអាប៉ោងរត់ជែកជើងគ្នា ជាហេតុបណ្តាលឲ្យអ្នកបាញ់មេអាប៉ោងមានឈ្មោះ នៅ តារា អាយុ ៤៨ឆ្នាំ បច្ចុប្បន្នរសនៅភូមិយាងថ្មី ឃុំកូប ស្រុកអូរជ្រៅ ខេត្តបន្ទាយមានជ័យ រត់រហូតគាំងបេះដូងដួលសន្លប់នៅលើភ្លឺស្រែ។

ស្របពេលដួលសន្លប់ភ្លាមៗខណៈវេលាម៉ោង០៤រសៀលថ្ងៃកម្លាំងសមត្ថកិច្ចចុះបង្រ្កាប ទីតាំងអាប៉ោងខាងលើបានជួយសង្រ្គោះ សែងជនរងគ្រោះដែលជាអ្នកបាញ់មេប៉ោងទៅសង្រ្គោះបន្ទាន់នៅមណ្ឌលសុខភាពសឹង្ហ និងពិនិត្យដោយយកចិត្តទុកដាក់ពីលោកវេជ្ជបណ្ឌិត នៃមណ្ឌលសុខភាពតែជាអកុសលជនរងគ្រោះបានស្លាប់បាត់ទៅហើយ។

តាមការពិនិត្យពីលោកវេជ្ជបណ្ឌិត នៃមណ្ឌលសុខសឹង្ហជនរងគ្រោះភ័យរត់រហូតគាំងបេះដូងជាហេតុបណ្តាលឲ្យស្លាប់។

សមត្ថកិច្ចបានបញ្ជាក់ថា ការចុះបង្រ្កាបអ្នកលេងល្បែងស៊ីសង (អាប៉ោង) ខាងលើគ្រាន់តែឃាត់ខ្លួនយកទៅអប់រំតែប៉ុណ្ណោះ ដោយហេតុធ្វើឲ្យអ្នកលេងភ័យរត់គ្រប់ៗគ្នារហូតបណ្តាលឲ្យអ្នកបាញ់មេអាប៉ោងរត់រហូតគាំងបេះដូងស្លាប់។

មន្រ្តីជំនាញកោសលវិច័យរួចរាល់ហើយបានដាក់ការសង្ស័យជនរងគ្រោះភ័យរត់រហូតដួលសន្លប់គាំងបេះដូងស្លាប់ ចំណែកសពសមត្ថកិច្ចបានបានបំពេញរបាយការណ៏រួចបានប្រគល់សពជូនគ្រួសារធ្វើបុណ្យតាមប្រពៃណី។