ខេត្តឧត្ដរមានជ័យ : ប្រភពពីក្រុមឈ្មួញនិងអាជីវករនាំចេញទំនិញពីប្រទេសថៃ តាមច្រកទ្វារអន្តរជាតិជាំ ស្រុកអន្លង់វែង បានឲ្យដឹងថា បច្ចុប្បន្នអាជីវកម្មរបស់ពួកគេស្ទើរតែគ្មាននៅសល់កម្រៃសម្រាប់ទិញអង្ករច្រកឆ្នាំង។​ ដោយហេតុថា លោក ញិប ផល្លិក មន្រ្តីគយចល័តតំបន់៥ ឈរជើងក្នុងស្រុកអន្លង់វែង បង្កើតកុងត្រូលជជុះតាមផ្លូវក្នុងស្រុកអន្លង់វែង គាបយកលុយលើតុក្រោមតុពីពួកគេតាមអំពើចិត្ត។ ដូច្នេះឈ្មួញនិងអាជីវករដែលនាំចូលទំនិញពីថៃ តាមច្រកទ្វារអន្តរជាតិជាំ ចូលមកលក់ចែកចាយនៅស្រុកអន្លង់វែងនិងស្រុកផ្សេងៗទៀតត្រូវប្រឈមនឹងការលំបាកយ៉ាងខ្លាំង។

តាមការបញ្ជាក់ពីក្រុមឈ្មួញនិងអាជីវករបានឲ្យដឹងទៀតថា លោក ញិប ផល្លិក មន្រ្តីគយចល័តតំបន់៥ ឈរជើងក្នុងស្រុកអន្លង់វែង បានបង្កើតកុងត្រូលជជុះនៅចំណុចភូមិជើងភ្នំ ឃុំត្រពាំងប្រីយ៍ ស្រុកអន្លង់វែង ខេត្តឧត្តរមានជ័យ គាបយកលុយពីពួកគាត់ដោយគ្មានការយកយល់ឡើយ។ ផ្ទុយទៅវិញលោក ញិប ផល្លិក មន្រ្តីគយចល័តតំបន់៥ ឈរជើងក្នុងស្រុកអន្លង់វែង បានឃុបឃិតឲ្យឈ្មួញនាំចូលសាច់មាន់ ជង្គង់មាន់ ស្លាបមាន់ គ្រឿងក្នុងជ្រូក គ្រឿងក្នុងគោ ខូចគុណភាពឬមានផ្ទុកសារធាតុគីមី ដឹកជញ្ជូនទំនិញទាំងនោះទៅដល់គោលដៅយ៉ាងរលូន។ ចំណែកលោក ឈុន​ សុភមង្គល ប្រធានសាខាគយខេត្តឧត្តរមានជ័យនិងលោក គួន សុភាព មេគយចល័តខេត្តឧត្តរមានជ័យ តែងបណ្តោយឲ្យលោក ញិប ផល្លិក មន្រ្តីគយចល័តតំបន់៥ ឈរជើងក្នុងស្រុកអន្លង់វែង និងបក្ខពួកធ្វើអ្វីៗតាមអំពើចិត្តរបស់ខ្លួន។

ប្រភពព័ត៌មានពីក្រុមឈ្មួញរកស៊ីដឹកឥវ៉ាន់ចេញពីប្រទេសថៃបានបន្តទៀតថា លោក ញិប ផល្លិក មន្រ្តីគយចល័តតំបន់៥ ឈរជើងក្នុងស្រុកអន្លង់វែង បានឲ្យដឹងថា បើគ្មានការបើកដៃពីសំណាក់លោក ឈួន សោភា មេគយចល័តតំបន់៥ ទេនោះគឺក្រុមគយចល័តតំបន់៥​ ឈរជើងក្នុងខេត្តឧត្តរមានជ័យ មិនអាចធ្វើអ្វីតាមអំពើចិត្តបានទេ។ ជាក់ស្តែងករណីលោក ញិប ផល្លិក មន្រ្តីគយចល័តតំបន់៥ ឈរជើងក្នុងស្រុកអន្លង់វែង បង្កើតកុងត្រូលជជុះប្រមូលលុយតាមរបៀបពុករលួយក្នុងស្រុកអន្លង់វែង គឺមានការឃុបឃិតជាប្រព័ន្ធទើបអ្វីៗអាចប្រព្រឹត្តទៅដោយរលូន។