បាត់ដំបង៖ ថ្ងៃអង្គារ៍ ៧រោច ខែស្រាពណ៍ ឆ្នាំជូត ទោស័ក ពស ២៥៦៤ ត្រូវនឹងថ្ងៃទី១១ ខែសីហា ឆ្នាំ២០២០ វេលាម៉ោង១១ និង៣០ នាទីយប់ក្រោមការបញ្ជាផ្ទាល់ពីឯកឧត្តមងួនរតនះអភិបាលខេត្តបាត់ដំបងលោក ផេងសុធី អភិបាលក្រុងបាត់ដំបង ព្រមទាំងលោកឆាងវ៉ាន់ឆៃអធិការក្រុង បានអញ្ជើញដឹកនាំកម្លាំង ចុះត្រួតពិនិត្យឡឺវែលក្លឹប ដែល មានទីតាំងស្ថិតនៅភូមិរំចេក៤សង្កាត់រតនះក្រុងបាត់ដំបង ដែលល្មើសនឹងសេចក្តីណែនាំ មិនចូលរួម បង្ការ ទប់ស្កាត់ការរីករាលដាលនៃជម្ងឺ​កូវីដ​-១៩ តាមការណែនាំរបស់ អជ្ញាធរក្រុងនិង ក្រសួងសុខាភិបាល ក៏ ដូចជា រាជរដ្ឋាភិបាលកម្ពុជា។

ជាគោលការណ៍ លោក អភិបាល ក្រុងបានហៅម្ចាស់ទីតាំងខាងលើ មកធ្វើការអប់រំណែនាំនាវេលាថ្ងៃនេះ។ ក្នុងករណីម្ចាស់ទីតាំងនៅតែមិនអនុវត្តតាមការណែនាំនេះ គណៈបញ្ជាការឯកភាពរដ្ឋបាលក្រុងនឹងមានវិធានការយ៉ាងម៉ឺងម៉ាត់បំផុត រួមមានដកហូតអាជ្ញាបណ្ណ និងបិទទីតាំងអាជីវកម្មនេះ តែម្តង៕