ផ្ទុះធុងហ្គាស លាន់ស្នូរដូចគ្រាប់មីន បណ្តាលអោយបុរសម្នាក់ស្លាប់ ១រំពេច
បាត់ដំបង៖ករណីផ្ទុះធុងហ្គាសនៅផ្ទះគ្រូពេទ្យមួយកន្លែងក្នុងស្រុកសំពៅលូន បណ្តាលអោយជនរងគ្រោះម្នាក់ស្លាប់យ៉ាងអាណោចអាធ័ម។
ហេតុការណ៍នេះបានកើតឡើងកាលពីវេលាម៉ោង៥និង៣០នាទីល្ងាច ថ្ងៃទី១២ ខែមិនា ឆ្នាំ ២០២១ នៅចំណុចផ្ទះលោកគ្រូពេទ្យ ឈ្មោះ ឃឹម សាម៉ុន ស្ថិតក្នុងក្រុមទី៩ ឃុំសេរីមានជ័យ ស្រុកសំពៅលូន ខេត្តបាត់ដំបង។
ជនរងគ្រោះឈ្មោះ៖ ម៉េង ហុឹង ភេទប្រុស អាយុ២៣ឆ្នាំ ត្រូវកម្មករ បំរើការងារនៅផ្ទះលោកគ្រូពេទ្យ ដែលមានទីលំនៅ ក្នុងឃុំ កើតហេតុខាងលើ។
ប្រភពព័ត៌មានពីមន្ត្រីនគរបាលស្រុកសំពៅលូនបានបង្ហើបថា៖មុនពេលកើតហេតុ ប្រពន្ធជនរងគ្រោះបានប្រាប់ប្តីដែលទើបតែមកពីចំការអោយចូលទៅមើលធុងហ្គាស ពីព្រោះធុងហ្គាសនោះមានចេញខ្យល់ ស្រាប់តែមួយសន្ទុះក្រោយមកធុងហ្គាសនោះក៍ផ្ទុះលាន់ស្នូរដូចគ្រាប់មីន បុើងដំបូលផ្ទះ បង្កអោយមានការភ្ញាក់ផ្អើលដល់ប្រជាពលរដ្ឋ អាជ្ញាធរនិងសមត្ថកិច្ចមូលដ្ឋានចុះទៅអន្តរាគមន៍នៅទីតាំងកើតហេតុភ្លាមៗនោះផងដែរក៍ប៉ុន្តែមិនអាចជួយសង្គ្រោះជនរងគ្រោះបានដោយសាររបួសធ្ងន់ធ្ងរពេក។
សមត្ថកិច្ចបានបន្តថាចំពោះករណីផ្ទុះធុងហ្គាសនេះកម្លាំងនគរបាលជំនាញនៃអធិការដ្ឋាននគរបាលស្រុកសំពៅលូនកំពុងស្រាវជ្រាវ៕
